அருட்பெருஞ்ஜோதி அருட்பெருஞ்ஜோதி
தனிப்பெருங்கருணை அருட்பெருஞ்ஜோதி
திருச்சிற்றம்பலம்

எங்கள் நேயம்மிகுந்திட்ட அழைப்பை அன்புடன்ஏற்றுத்
தாங்கள் நேரலையில் ஆற்றியஅந்த அருட்பொழிவினை
அகிலம்தழுவிப் பாய்ந்த அமுதத்தமிழ்அலை என்பேனோ!
தமிழ்கூறும் நீடுலகிற்கு அறிவுப்பெருவிருந்து என்பேனோ!

இரண்டுமணிநேரம் முழங்கிய அழகிய தமிழ்மழையில்
வரண்டுபோய்க் கிடந்த உளங்களில் வள்ளல்அருளமுதம்
திரண்டுவந்து தேங்கியது! திகழ்ந்ததுநேரலை! ஒளியின்றி
இருண்டஉயிரக மொட்டும் மலர்வுற்று மணந்தரும்என்றும்!

வள்ளல் பெருந்தொண்டர்கள் வாழ்த்துச் சொல்லிட
வள்ளல் வழிவரும் எம்போல்வார் வளம்பலபெற்றிட
தங்கள் சுத்தசன்மார்க்க நற்பணிகள் உலகைவெல்ல
எங்கள் பிரார்த்தனைகள் இன்றுபோல் என்றும்முண்டு!

பட்டிதொட்டி எங்கெங்கும் நம்சீர்மிகும் சுத்தசன்மார்க்கப்
பட்டிமன்றத்து நடுவராய் இருந்து தமிழ்பேசும்மனங்களிலே
ஜீவகாருண்யச் சிந்தனைகளைச் செதுக்கிவரும் சிற்பியே!
ஜீவனுள்ள செந்தமிழே! பசிக்கவேகாத்துளோம் நின்பந்திக்கு!

சடங்குகளில் அடங்காத சுத்தசன்மார்க்கத்தை எங்களின்உள்ளக்
கிடங்குகளில் அடங்கும்படி ஆற்றும் ஐயாஉமதுசொற்பொழிவின்
கவிப்புலமும் கருத்துச்செறிவுமிகு ஒலிப்புலமும் என்றும்எங்கள்
செவிப்புலனைச் செழிக்கவைத்துச் சிந்தைக்குச் சிறகுதருமேவாழி!

வளமோடு இன்புற்று வாழ்வாங்கு வாழ்க வாழ்கவே! அருட்பெருஞ்ஜோதி...