சன்மார்க்க இசை வரலாறு என்னும் தலைப்பை இன்னூலுக்கு இட்டு எழுத துவங்கும் போது, பல அன்பர்கள் இம்முயற்சியை அறிந்து பாராட்டி ஊக்குவித்தனர், அதோனோடு, சில அன்பர்கள் சன்மார்க்கத்திற்க்கும் இசைக்கும் தொடர்பு உண்டு என்பதே புதிய செய்தியாக உள்ளது என்றனர், ஆனால் இது உண்மையில் புதிய செய்தி அல்ல, 150 க்கும் மேற்ப்பட்ட ஆண்டுகளாக "இசைப் பயன்பாடு" என்பது சன்மார்க்கதில் நடைமுறையில் உள்ளது,

சன்மார்க்கம் என்பது தவநேயம், உயிர் நேயம், சிவ நேயம் ஆகிய மூன்றையும் அடிப்படியாக கொண்டது, சிவ நேயத்திற்க்கும், வழி பாட்டிற்க்கும் இசை இன்றியமையாத ஒரு கருவியாகும், காரைக்கால் அம்மையாரின் காலத்திற்க்கும் முன்பிருந்து, பண்ணும் இசையும் தமிழ் நாட்டில் இறைஉணர்வை வளர்க்க பயன்பட்டு வந்தது, அதோடு இறைவனே இசை வல்லான் என்றும் அவன் இசை வடிவாக உள்ளான் என்னும் கூற்று பண்டைய தமிழ் நூல்கள் முதல் அருட்பா வரையில் காணக்கிடைக்கின்றது, இசை என்பது மருள் நிறைந்த மனக்கருங்கல் பாறையையும் கரையச் செய்யும் ஒரு இரசவாதம் என்பதை உணர்ந்தோர் நன்கு அறிவார்கள், அந்த வகையில் சன்மார்க்க வழிபாட்டிலும், சங்கத்திலும் இசைப்பாடல்களின் பயன்பாடு பெருக இருந்ததை காண முடிகின்றது,

வள்ளல் பெருமானும் பெரும் இசை அறிஞாரக இருந்தார் என்பதையும், அவரின் மாணாக்கர்களில் ச.மு.கந்தசாமியார் முதலிய பலரும், சன்மார்க்க அன்பர்களும் இசை பாடும் வல்லமை கொண்டவர்களாக இருந்தனர் என்பதையும், அவர்கள் திருஅருட்பா மற்றும் சன்மார்க்கம் சார்ந்த பாடல்களுக்கு இசை முறையினை அமைத்து மரபுவழியாக பாடியுள்ளனர் என்பதயும், வள்ளல் பெருமானின் வரலாறு மற்றும் சன்மார்க்கம் சார்ந்த நூல்களின் மூலம் நன்கு காண முடிகிறது,

அதுமட்டும் அல்லாமல் நமது வள்ளலின் அருட்கொடையாகிய "திருஅருட்பா" இலக்கண இலக்கிய செழிப்போடு இசைச் செழிப்பும் கொண்டது என்பதை விளக்கும் விதமாக பெரிய இசை அறிஞர்களின் (எம்.எஸ். சுப்புலட்சுமி, பாலமுரளி கிருஸ்ணா மற்றும் பலர்...) இசை நிகழ்வில் மற்றைய இசைப் பாடல்களுக்கு இணையாக அருட்பாவும் பாடப்படுகின்றது, அதோடு இன்றைக்கு அருட்பாவுக்கு இசை சங்கங்கள் உள்ளன, முழு இசை விழாக்கள் நடைபெறுகின்றன என்பதே போதுமான சான்று ஆகும், அதோடு இசை அறிஞர்கள் பலரும் சன்மார்க்க அன்பர்களாகவே உள்ளனர் என்பது மேலும் சிறப்பு.

இன்றைக்கு அருட்பா பாடல்கள் பண்ணிசை, கருநாடக இசை, திரைஇசை வடிவிலும், வில்லுபாட்டு, கும்மிபாட்டு, கோலாட்டம் முதலிய கிராமிய இசை வடிவிலும் இசைக்கப்பட்டு, சன்மார்க்க கருத்துக்கள் எளிய மக்களிடம் சென்று சேர்கின்றன என்பது எல்லோரும் அறிந்ததே, இசையால் சன்மார்க்கமும், சன்மார்க்கத்தால் இசையும் வளர்ந்தது, வளருகின்றது, என்பது மறைக்க இயலாத உண்மை ஆகும், ஆக இனியும் வளரும், வளர்க்கவும் வேண்டும்,

இப்பணியினை செய்யும் செய்யும் தகுதி, எனக்கு உண்டோ இல்லையோ அறியேன், ஆயினும் நமது வள்ளல் பெருமானின் திருவருளும், பெரியோர்களின் ஆசியும் இவ்வரும் பணியை நிறைவு செய்ய துணை செய்யும் என்னும் உறுதி பற்றி இப்பணியை மேற்கொள்கின்றேன்.

அன்பர்கள் படித்து அறிந்து பயன்பெருக!




                                                                                                              தொடரும்...